പൂവ്

ആള്മാറി വെട്ടിയപ്പോൾ
രക്ത സാക്ഷിയായിപ്പോയ
സുഗുണന്റെ ശവമടക്കു കഴിഞ്ഞു 
മടങ്ങുന്നതിനിടയിലാണ്
യഥാർത്ഥത്തിൽ
കൊല്ലപ്പെടെണ്ടിയിരുന്ന
കണാരന്റെ ഭാര്യയെ കണ്ടത്

വിധവയാക്കപ്പെടാൻ
അർഹതയുള്ള വേറെയും
കുറെ പെണ്ണുങ്ങൾ ...

പിന്നീട്
കണാരേട്ടന്റെ ശവമടക്ക്
കഴിഞ്ഞു മടങ്ങുമ്പോൾ
ഒറ്റ വിചാരമേ ഉണ്ടായിരുന്നള്ളൂ
സുഗുണന്റെ വിധവയെ
സഹായിച്ചു കൊണ്ടിരിക്കുന്നത് പോലെ
കണാരേട്ടന്റെ വിധവയെയും
സഹായിച്ചു കൊണ്ടേയിരിക്കണം

അതിനിടയിലാണ്
എന്നെ വെട്ടാനിടയുള്ള
സന്തോഷിന്റെ കയ്യിലൊരു
പനനീർ പൂവ് .ശ്രദ്ധയിൽപ്പെട്ടത്
സുഗുണന്റെയും
കണാരന്റെയും വിധവകള്ക്ക്
ഞാൻ സമ്മാനിച്ച
കടും ചുവപ്പ് നിറത്തിലുള്ള
പനനീർ പൂവ്.