കാട്ടുപോത്തു വെറും പോത്താകുമ്പോള്‍

എഴുതപ്പെടാനിരിക്കുന്ന 
ഖണ്ട കാവ്യത്തിന്റെ 
ഇതിവൃത്തത്തിലെക്ക് 
വെളിച്ചം വീശുന 
ചില സൂചനകള്‍.

കാട്ടുപോത്ത്
മുയലാകാന്‍ ആഗ്രഹിച്ചത്
മുതല്‍
നേരിടുന്ന
അസ്തിത്വ പ്രതിസന്ധികളെ
കുറിച്ചായിരിക്കും
പ്രാരംഭം .

കേള്‍ക്കാന്‍
കൊതിച്ച വാക്കിന്റെ
ഇന്ദ്രജാലങ്ങളില്‍
വിശ്വോസമര്‍പ്പിച്ചു
ചെവിയോര്‍ത്തു
കാത്തിരുന്നതിനെ
കുറിച്ചാണ് അടുത്തത് .

ഒരു സ്പര്‍ശത്തിന്റെ
മായാജാലങ്ങളില്‍
പ്രതീക്ഷയര്‍പ്പിച്ചു
പാഴാക്കിയ കാലത്തെ
അടയാളപ്പെടുത്തുന്ന
ചില കാര്യങ്ങള്‍

ഒരൊറ്റ പോരിന്റെ
വീര്യം പോലും ബാക്കി
വെക്കാതെ ,
ഒരു നോട്ടത്തിന്റെ ക്രൗര്യം
പോലും
അവശേഷിപ്പിക്കാതെ
പരിവര്‍ത്തനവും
പരിണാമവും മനസ്സില്‍
താലോലിച്ച നാളുകളെ
സംബന്ധിച്ച് ..

വീര്യം ചോര്‍ന്നു
മോങ്ങേണ്ടി വന്നതിനെ
കുറിച്ചും
ശൗര്യം നഷ്ടമായി
വെറും
പോത്തായി മാറിയതിനെ
കുറിച്ചും ആത്മനിന്ദയോടെ
ചിലത് .

ഒരു കാട്ടു പോത്ത്
വെറും പോത്താകേണ്ടി
വരുമ്പോള്‍
പുതുതായി ഉണ്ടാവുന്ന
പ്രശ്നങ്ങളെ
അടിസ്ഥാനമാക്കി
ചിലത്

അറവുകാരെ
കിനാവ്‌ കാണുന്നതിനെ
കുറിച്ചും
തൂക്കി വില്‍ക്കുന്ന
മാംസമാകുന്നതിനെ
അല്പം വിസ്തരിച്ചും

കാട്ടില്‍ നിന്ന്
അറവുശാലയിലേക്ക്
എന്ന്
ശീര്‍ഷകം നല്‍കാനുള്ള
കാരണത്തെ കുറിച്ച് .